Camille’s dog

Allgemeng By 17. Oktober 2012 Tags: No Comments

Ët as nees esouweit. Auswäertsmatch Israël-Lëtzebuerg. 4 Deeg no engem 6-0 Debackel géint de sëlweschten Géigener. Vu daat Israël bal um anneren Enn vun der Welt läit sinn verständlëcherweis nët vill Supporter matgeflunn. An Hurra, den RTL iwwerdréit op hierem zweeten Programm. Ët gläicht engem Wonner ! Iergendwéi as ët ëmmer nees eng riesen Iwwerraschung wann „onsen“ Sender aus friemen Länner Live Sportbiller iwwerdréit. D’Zuschauer freeen sëch well een sëch elo nët vrun den Komputer setzen muss an no iergendengem Livestream mat hebräischem Kommentar um weltwäiten Netz siichen muss. Dofir all op de Canapé a vrun d‘ Flimmerkëscht. Waat ee Luxus fir d’Nerven an den Hënneschten.

Mee dann iwwerkennt mëch ee komëscht Gefill, rätselhaft daat d’Gemitlëchkéet esou lues a lues verflitt. Ët setzt een dach esou gudd op den gefierderten Këssen, d’Béier as erfreschend an d’Chips’en läien grëffbereet an der Schossel. Waat soll dann sinn ?
Do as ët ! D’Origine vum Onwuelsinn. D’Stëmm drengt an d’Oueren a wéi d’Suddelen vum Pawlow séngem Mupp beim Klang vun der Schëll iwwerkennt mëch beim Klang vu senger Stëmm eng ënnerlëch Nervositéit.
D’Stëmm gëtt sëch ze erkennen : Camille Ney, heescht de gudden Herr. Komësch daat de Reflex vum Medium iwwert den de Reiz kennt ofhängëg as. Ginn ëch der Stëmm iwwert de Radio ausgesaat an de Kontext as een anneren wéi d’Iwwerdrohung vun engem Fussballsmatch dann spieren ëch d’Nervositéit nët. Mee elo leeft de Fernseh. Mäin zentralt Nervensystem as gehacked. Ëch gi Nervös a si gereizt.

D’Spill geet las. Ëch sinn am Bann vun den onqualifizéierten Bemierkungen vum Kommentator. Ëch mierken daat mäi Gehier sëch schwéier deet de Fokus méi op d’Spill ze setzen wéi op daat Gebraddels daat aus den Bochsen kléngt. Ëch wëll dach just ee Fussballsmatch kucken. Ëch wëll mëch iwwert d’Spillgeschéien freen oder opreegen. Merde, Fussball as dach de Grond firwaat ëch héi setzen.
D’Nervositéit gett awer heinsdo ennerbrach wann de Co-Kommentator mengem „Meeschter“ erklärt daat daat waat hien vu sëch gett nëmmen Quatsch as an him eng Lektioun iwwert Taktësch Finessen gett. Gëff him ët Jeff ! Wéi fréier grätscht den Strasser zweschen de Sätz a weist ween de Patron um Feld as. Ët wierkt wéi wann de Strasser d’Mëttel zur Heelung vu menger „Camill Ney Neurose“ kéinnt sinn. Hien as de Gronn firwaat ëch den Toun nët ausmaachen. Oh du schéin Hoffnung !
Mee waat soll daat ? De Ney’schen Camille gett nët op. Hien ridikuliséiert dem Spezialist seng Aussoën. Laacht, mëcht wéider. Ët as wéi wann hien nët verstoën geng waat säi Geigeniwwer him seet. D’Wuerzel vu mengem Onwuelsinn wiest a wiest, ët hällt nie op. Hien as wéi de Zlatan I. ! Léist sëch vu kengem beandrocken a geet säi Wee.

Ëch ginn ët op. De Béier gett zu den Chip’s an d’Schossel geschott an ech friesen dorausser. Vläit hiewen ëch elo gläich nach d’Been. Wouf ! Ëch si konditionéiert…

Share:

Paradoxon Luc Holtz

Allgemeng, Fussball international, Fussball national, Nationalekipp By 16. Oktober 2012 Tags: 2 Comments

De Laurent Schüssler analyséiert gëschter an haut am Wort relativ gutt, wéi de Luc Holtz sech alt selwer an d’Bredouille bréngt matt Aussoen vis-à-vis vun der Press an och dee Moment a Punkto Equipenopstellung. Ouni elo op den Detail anzegoen, hunn ech effektiv heiansdo den Androck, datt munch Opstellung vun engem Spiller (wéi e Freideg Bukvic & Philipps an der Zentralverdeedegung) einfach aus Aktionsismus gemat get oder vläicht fir esouguer der Press, déi vläicht gutt analyséiert, ze weisen wie Chef ass. Dat ass natirlech schwéier ze beweisen, fest steht awer, datt vill Leit vu bausse fannen, datt net ëmmer déi stärksten 11 um Terrain steht.

Dat Thema gouf et no Malta, no Georgien an och elo nom 1.Match géint Israel, op mannst wat d’Verdeedegung betrëfft. Donieft verblüfft, datt den Trainer sech opreecht, datt den Dan Da Mota eréischt als 3. 11m-Schütze virgesi war an him dann ëffentlech virwerft, et géifen Hierarchien net respektéiert ginn. D’Äntwert gët den Dan Da Mota dann och erëm iwwer d’Press. Et bleift ze hoffen, datt déi Saachen intern beschwat ginn, well soss get et awer e sérieux’e Problem.

Natirlech huet de Luc Holtz Recht, datt hie seet, de ganze Block hätt ze héich am 1.Match géint Israel agéiert. Mä wien ass dann dofir verantwortlech, wien huet de Spiller dat gesot? A wann den Trainer et net gesot huet, huet hien de Problem, datt hien d’Equipe entweder net erreecht oder si hien net versteht. Esou oder esou e schwéiere Problem.

An dann war hie jo net onschëlleg drun, wann d’Equipe net méi mat de Féiss um Buedem stoung. An Nordirland hätt et och kënnen eng bei d’Läffele ginn, mä eise Défence huet dunn op mannst eng anstänneg Abseitsfal praktizéiert. Trotzdem gouf genuch Verbesserungspunkten an der 1.Halschent zu Belfast. Mä dann gët iwwer d’Press gelästert amplaz niichter ze analyséieren. Kloer, Nordirland huet stoësch ëmmer dat selwecht gespillt an iergendwann sinn d’Roud Léiwen do derhannert komm.

Sécher ass awer och richteg, datt net alles därf schlecht geriet ginn. Mä et gehéiert och net alles an d’Ëffentlechkeet (wéi uewen beschriwwen d’Geschicht mam 11m géint Israel). Mä eng gewësse Verbruetheet huet näischt do ze sichen an déi hat z.B. de Guy Hellers wat d’Equipe an d’Press ubelaangt nie (vläicht op aaneren Niveauen an der FLF, mä dat ass elo hei Off-Topic). Dogéint huet de Luc Holtz méi Courage, fir méi offensiv opzestellen. Dat ass jo och schéin a gutt, mä da muss een am Fall, wou een an d’oppe Messer leeft, och dozou stoen an d’Schold op sech selwer huelen.

Dowéinst weess een nie, wou ee mam Luc Holtz drun ass. An dat däerf net um Réck vun der Equipe, der FLF an em Lëtzebuerger Fussball geschéien. Allez Lëtzebuerg!

Share:

Huel se elo online

Allgemeng By 10. Oktober 2012 1 Comment

Ab elo si „mir“ mat engem Blog iwwert d’lëtzebuerger Nationalekipp an de Fussball zu Lëtzebuerg online. „Mir“, dat sin momentan 5 Leit, déi sëch an deem läschte Joerzéngt duerch d’lëtzebuerger Nationalekipp an den M-Block kenne geléiert hun an kaum ee Match vun der Nationalekipp verpasst hun.

Iwwert wat geet et hei?

An éischter Linn geet et em d’lëtzebuerger Fussballnationalekipp an hir Fans. Sou wierte mir souwuel iwwert d’Mätcher selwer, wéi awer och iwwer d’Reesen op Auswäertsmatcher schreiwen. Doniewt kënnen awer och aaner Themen ugeschwat gin, déi ee Lien mam lëtzebuerger Fussball hun, sief et d’Championnat, d’Coupe de Luxembourg, oder di gudd aal Diskussioun iwwert Sënn an Onsënn vun engem neien Nationalstadion.

Méi an deenen nächsten Deeg!

Share: