Browsing Articles Written by

Luiz

Huelse-netsoueescht: D’Supporter op der Europameeschterschaft…

Allgemeng, EM-Quali 2016, Huelsenetzeeescht By 12. Juni 2016 No Comments

All zwee Joer, irgendwann tëscht de Barragemätcher (dat ass, wa 1492 Zuschauer verzweifelt zu Kanech no enger Parkplaz sichen) an der Qualifikatioun fir d’Coupe d’Europe (dat ass, wa viru 634 Leit am Nosbaumstadion zu Diddeléng d’Champions League Hymn ertéint) mutéieren op eng erstaunlech Manéier fir e Mount all Leit zu Fussballsexperten. Dat ass e Phänomen, dat een och, awer bei wäitem net nëmmen, hei am Land huet. D’soziologesch Fakultéit vun huelse.lu huet déi verschidde Supporter-Typen analyséiert a kategoriséiert, an ass elo frou Iech kënnen éischt Resultater vun eiser Etude ze publizéieren.

Share:

2016 – en éischten Ausbléck

Allgemeng By 4. Januar 2016 No Comments

Fir d’alleréischt wënschen ech, am Numm vun der ganzer Ekipp vum Huelse, vun dëser Plaz aus all eise Lieser vill Gléck am neie Joer.

D’Qualifikatioun fir d’Europameeschterschaft a Frankräich ass eriwwer, an d’Lëtzebuerger A-Nationalekipp wiert deemno bis de Summer just Frëndschaftsmätcher spillen. Fir de 25.Mäerz 2016 steet mat Bosnien-Herzegovina schon en éischten attraktive Géigner fest. Och wann Dzeko, Pjanic a co. net op der Europameeschterschaft derbäi wierte sinn, ass dësst mat Sëcherheet e Géigner, dee vill Zuschauer op d’Arëler Strooss wiert lackelen.

Share:

Zilina

Auswäertsreesen, EM-Quali 2016, Match Reports, Nationalekipp By 31. März 2015 No Comments
Marianske Namestie - den historeschen Zentrum vun Zilina, am Lëtzebuerger Volleksmond "d'Maartplaz"

Marianske Namestie – den historeschen Zentrum vun Zilina, am Lëtzebuerger Volleksmond “d’Maartplaz”

Zilina, de 27.Mäerz 2015 – endlech rem Lëtzebuerg auswäerts!

Während d’Majoritéit vun de Lëtzebuerger Supporter mat Minibussen vu Lëtzebuerg ugereest ass, sinn de CK an ech scho mëttwochs vu Lëtzebuerg op Wien geflunn. Vun hei aus goung et donneschdes weider op Bratislava, ier mer eis freides Moies op de Wee op Zilina gemaach hunn.

Départ war um 9 Auer 55 op der Hlavna Stanica zu Bratislava, wou mer den Zuch Richtung Kosice geholl hunn, deen och zu Zilina stoe bleiwt. Dëss Zuchfahrt vun 2 Stonne 40 war iwweriens méi gënschteg ewéi déi 16minüteg Fahrt mam City Airport Train vum Flughafen Schwechat an de Wiener Zentrum.

An eisem Sechser-Abteil hate mer e Slowak sëtzen, deen zu Wien schafft an ënnerwee war d’Famill an den Osten vun der Slowakei besichen ze goen. Mat him hu mer eis nawell laang ënnerhal an en huet eis vill interessant Geschichten iwwert säi Land erzielt. Och wann hien selwer kee Fussballfan war huet en puermol betount, et wier schued dass en elo bei d’Famill misst, wëll en hätt déck Loscht mat eis zu Zilina op den Tour ze goen. E wéineg irritéierend war par contre dat schlecht Bild wat e vu slowakeschen Fussballfans hat.

 

trinity

An der Mëttesstonn si mer zu Zilina ukomm. Telefonesch si mer gewuer ginn, dass schon eng Rei Lëtzebuerger am Guinness Pub op der Marianske Namestie (der zentraler Plaz zu Zilina, wuel déi ominéis, an am Virfeld ënnert Lëtzebuerger Fussballfans villzitéiert Maartplaz vun Zilina) wieren. Hei si fréier oder spéider déi meescht Supporter vun de Léiwen agetraff an eigentlech war hei alles genau esou, wéi een sech et op enger Auswäertsrees wënscht: et gesäit ee Kollegen erem déi ee puer Wochen oder Méint net gesinn huet, et gëtt gesong a gelaacht, an et gëtt 0,5-Liter Béier fir 1,10 Euro.

Ier mer aus dem Pub eraus gaang sinn, sinn divers wëll Gerüchter iwwer gewaltbereed Supporter vun de Slowaken opkomm… fin de compte war awer ewéi sou oft alles hallef sou wëll – weder virum nach nom Mätch gouf et och nëmmen am Usaz e Problem mat de Supporter aus der Slowakei.

Den MSK Stadion ass keen architektonescht Wonnerwierk, awer e Stadion dee säin Zweck erfëllt… a wou mer virun allem eng ganz gutt Vue op den Terrain haten. Ech erspueren eis alleguer, de Mätch nach eemol ze résüméieren. D’Stëmmung vun de Lëtzebuerger Supporter war an der 1.Halschent nawell gutt, an der 2.Halschent, wou de Mätch wäitesgehend ofgeflaacht ass huet d’Ambiance sech deementspriechend ugepasst.

 

supporter zilina

Zum Spillverlaf an zum Resultat just e kuerze Gedanken: d’Enttäuschung war, bei alle Bedeelegten natierlech grouss. Dësst ass a mengen Aan en Indice dofir, dass d’Mentalitéit sech am Lëtzebuerger Fussball déi lescht Joren an eng gutt Richtung gedréit huet… de Lëtzebuerger Fussball huet momentan rem Ambitiounen, déi Zäiten wou eng Défaite mat 3 oder 4 Goler auswäerts amfong iwwerall normal war an ee just géint d’Färöer oder Liechtenstein konnt enttäuschen sinn definitiv eriwwer!

Nom Mätch si mer, op Invitatioun vum Paul Philipp, nach an den Holiday Inn laanscht gaang. Eng Rei Lëtzebuerger Supporter hunn iwwerdeems nach e Patt am VIP vum Stadion mat de Responsabelen vun der FLF an slowakescher Politprominenz geholl, duerno souze mer all zesummen, allerdéngs ouni slowakesch Politiker, an der Lobby vum Hotel vun der FLF-Delegatioun. Nodeems d’Bar zou war ass et eisem Präsident awer nach gelong, eng lescht Tournée Béier fir d’Supporter auszehandelen. Vun dëser Plaz aus duerfir nach e grousse Merci!

anzeigetafel zilina

De Moien hu mer nach en Tour duerch d’Stad gemaach, mee de Slowak am Zuch den Dag virdrun hat scho Recht… zu Zilina ass „not so much to see“… d’Marianske Namestie ass eng ganz flott Plaz, soss ginn et awer ofgesinn vun enger grousser Kierch kaum Sehenswürdegkeeten zu Zilina. Mam Zuch a mam Fliger goung via Bratislava a Wien zréck op Lëtzebuerg wou mer e Sonndeg den Owend geland sinn… wann een déi 90 Minutte Mätch ausklammert eng absolut gelongen Auswäertsrees!

 

Share: