Browsing Category

Match Reports

En 1-1 am Testmatch geint Metz

Match Reports, Nationalekipp By 29. Januar 2013 No Comments

Op engem verreenten killen Dënschden Owend trennt sech ons Nationalequipe mat engem 1-1 vum FC Metz.
De Luc Holtz huet d’Equipe an engem klassechen 4-4-2 opgesaat. Folgend Equipe stoung am Ufank um Terrain : Joubert – Jähnisch/ Hoffmann/Schnell/Jans- Da Mota/Peters ( cap)/ Philipps/ Laterza – Deville/Bensi.
Déi Ronn 150 Zuschauer hunn eng solid Leeschtung vun onse Léiwen, déi ouni Joachim, Gerson a Mutsch opgetrueden sinn,gesinn. Ausserdem huet och den Payal weinst Verletzung op en Asatz verzichten missen. Och wann d’Grenats wuel e bessen méi Ballbesëtz hatten, waren déi bescht Chancen op onser Säit. Mat e bessen méi Verméigen hätte mir an den eischten 45 Minutten och 1,2 Goaler schéisse kennen. Ënnert anerem hatten Bensi an Da Mota Chancen aus spëtzem Wénkel. D’Stiermer vu Metz hatten wuel och e puer Goalchancen mä 100 Prozentëscher waren kéng dobäi. An dobäi huet ons néi forméiert Innenvertéidegung och e puer Cado’en a Form vu Stellungsfeeler presentéiert. Kee Wonner vu dat d’Paire Schnell/Hoffmann jo nach net esou oft zesummengespillt huet.
An der zweeter Halschent gouf et dunn eng Réi Wiesselen. Ënnert anerem koum den Turpel fir den Deville. De Bensi ass och e bësse méi zréck gezu ginn an huet als 9,5 gespillt. Den Philipps ass nieft de Schnell an d’Innenvertéidegung gereckelt an den Hoffmann huet am defensive Mëttelfeld Plaz fonnt.De Laterza huet och mam Jans Positioune getosch. De éischtgenannte war och den aktiivste Spiller um Feld. Hien huet am defensive Spill net vill ubrennen gelooss an de Spiller vun der Fola wosst och am Spill no vir ze iwwerzeegen. Gescheit Säitewiessel, Debordementer an Ofschlëss stoungen um Programm.
Ab der 65 Spillminutt huet d’Spill e bëssen gelidden an et huet gewierkt wéi wann ons Spiller e bësse midd wieren. D’Metzer hunn do d’Heft e bësse méi fest an d’Hand geholl mä sinn awer nëmmen op Corner geféierlech ginn. Bei deenen Aktiounen huet de Joubert munchmol net ganz glécklech ausgesinn. Desen huet duerno awer zwou ganz flott Parade gewisen an huet ons am Match gehalen.
An der 84 Minutt huet dunn den Turpel zougeschloën. No enger gudder erausgespillter Aktioun iwwer lénks koum de Spiller vun der Etzella op der Strofraumgrenz un de Ball an huet mat engem flotte Crochet säi Géigespiller stoe gelooss. Äiskal huet hien duerno laanscht de Goalkeeper zum 1-0 eragesaat.
E puer Minutte méi spéit huet Metz ausgeglach an de Match war dunn och scho fäerdeg.
Fazit : e verdéngten 1-1 wou kee Leeschtungsennerscheed mat de Profien aus der Lorraine ze gesi war. E gudden Testmatch fir de Lännermatch geint Armenien ze prepareieren wou den een oder aneren bewissen huet dat hien hannert onsen dräi Profien Drock maachen kann.

Share:

Mat de roude Léiwen am hellege Land

Auswäertsreesen, Match Reports, Nationalekipp By 30. Oktober 2012 Tags: 1 Comment

No zwee enorm interessanten Deeg mat engem Guide zu Jerusalem fuere mir (de Martin, ee Schwäizer Groundhopper vu Basel, den Daniel, ee Lëtzebuerger Judd, an ech) en Densdeg, de 16.Oktober, mam Taxi op Tel Aviv. Nom Anchecken an eisem Hotel man mir eis op de Wee an den David Intercontinental, wou eis rout Léiwen an d´Journalisten iwwernuechten.

De Jean Schiltz taucht relativ séier mat eise Billjee op. Mat him, dem Marc Diederich an e puer Journalisten ënnerhale mir eis flott a verbotzen herno och nach e puer Penne all´arrabiata an der Lobby.

Nom Iessen trëppelen de Martin an ech bis erof op Jaffa, wou mir och de Bloomfield Stadium gesinn, wou all Proficluben aus Tel Aviv hir Heemmatcher ausdroen. Mir denken driwwer no samschdes de Spëtzematch Hapoel Tel Aviv géint Maccabi Haifa kucken ze goen, ginn ower leider herno gewuer, datt dee Match op nächst Woch verluet gouf.

Géint véier Auer fuere mir mat de Journalisten an de Responsable vun der FLF op de Match zu Ramat Gan.
D´Israelien hunn eng flott Aart a Weis d´Equipë virzestellen. Ofwiesselnd gëtt den Numm vun engem Spiller genannt an ee klenge Bouf, deen dëse Spiller duerstelle soll, leeft op den Terrain an hellt déi betreffend Positioun an. Léiw!

Leider stinn eis Lëtzebuerger vill ze déif a leie séier mat 0-1 hannen. Dem Holtz seng Taktik ass alt erëm wéi schonns am Heemspill net opgaangen. Wéinstens verléiere mir des Kéier “nëmmen” 0-3 an net 0-6 oder 0-7! Um Enn hunn eis Jongen esouguer nach eng Rei Goalchancen, wat ower wuel dru leit, datt Israel eis elo e bëssi spille léisst, de Match ass jo souwisou entscheed. Een Éiregoal wier ower nawell nach dra gewiescht: ee Schoss vum Laterza gëtt vun engem Defenseur op der Linn gekläert.

Ëmmerhin hunn mir de Fändel mam roude Léiw och an Israel héichgehalen, als Merci kréie mir den Maillot vum Daniel da Mota! An eng Rei israelesch Fans kommen eis begeeschtert applaudéieren! 🙂

Eise Bus steet an engem ofgespaarte Secherheetsberaich vum Stadioun. Mee no engem kuerzen Telefonat kennt de Jean Schiltz eis zur Hëllef an iwwerriet déi israelesch Sécuritéit eis eranzeloossen. Mir fueren zeréck bei den Intercontinental, wou och nach zwee jiddesch Frënn vum Daniel optauchen, déi zu Tel Aviv studéieren. Bis no Mëtternuecht setze mir nach zesummen an der Hotellobby, drénken e puer Béier a braddelen zesummen. Virun allem de Laurent Schüssler vum Wort erzielt allerhand interessant an och deelweis lëschteg Anekdoten. Och de Pol Philipp kennt nach kuerz laanscht.

Den Dag duerno si mir esouwuel am Wort, wéi och am Tageblatt an am Essentiel. Den Aurélien Joachim an de Mario Mutsch gi guer net schlofen. Si fléien nach an der Nuet zesumme mam Lars Gerson op Amsterdam fir esou séier wéi méiglech erëm bei hire jeeweilege Veräiner ze sinn.

Och mir man eis iergendwann an eist Bett.  No dësem Spilldag bleiwe mir nach weider véier Deeg am hellege Land, bis mir sonndes, den 21.Oktober erëm heem fléien. De Martin op Basel, den Daniel an ech an eis schéin Heemecht, wou mir eng net weider wichteg Hochzäit verpasst hunn.

Méi  iwwert d´Rees an Israel gett et (an daitscher Sprooch) hei.

Share: