Ween ass hei de Chef ? 

Nationalekipp By 24. Oktober 2012 Tags: 2 Comments

Mir waren nawell gutt an d’Qualifikatiounsronn vun der WM 2014 gestart andeems ons Léiwen de Portugisen e Been gestallt an een erkämpfte Punkt aus Nord Irland matbruecht hunn. Duerno krute mir an den zwee Mätscher géint Israel ons Grenze gewisen. An 180 Minutte krute mir 9 Geigegoaler geschoss. Wat engem dobäi opfale konnt ass datt a munch Situatiounen eng Persoun um Terrain gefehlt huet déi d’Equippe geféiert huet.

Nodeems de laangjärege Chef, de Jeff Strasser, seng Fussballscarrière huet missen ophalen hatt de René Peters déi Roll iwwerholl. Mat senger Erfahrung, Astellung a Spillintelligenz war hien den onbestriddene Kapitän an der Equipe. Dëst huet och zimlech laang a gutt fonctionnéiert bis eng laang Verletzungspaus hie verhënnert huet um Terrain ze stoen. Bei senger Ofwiesenhéet hu Spiller wéi Payal a Gerson gewisen datt si sportlech eng Nues Virsprong hunn an et ass spilleresch net opgefall datt de Peters net méi dobäi war. Wou hie bis fit war huet hien sech dunn missen hannen ustellen an nees op seng Chance waarden. Beim Heemmatch géint Israel huet hien esouguer missen op der Tribüne Platz huelen. U sech eng richteg Degradéieren. Véier Deeg a 6 Geigegoaler méi spéit war hien am hellege Land nees um Terrain a Kapitän. Eng Operstéiung war et awer net. Hien huet en zimlech solide Match gemeet mä et huet gewierkt wéi wann hie vill mat sech beschäftegt gewiescht war. Datt ass natierlech net ideal fir e Leader a seng Positioun huet sech domadder net bestäerkt. Den Zick-Zack-Kurs déi den Trainer mat him gefuer ass an d’Realitéit um Terrain schéinen hier Spueren hannerlooss ze hunn.

 

Ënnert deene Konditioune schéint et un der Zäit ze sinn datt een anere Spiller méi Responsabilitéit an en néie Kapitän d’Rudder iwwerhellt. Ween dat soll sinn léisst sech net einfach erausfanne well et dovunner offänkt ween wou spillt an ob en iwwerhaapt spillt.

An der Equipe ginn et verschidde Spiller déi natierlech Leader sinn. Zwee vun deene spillen op deenen zwee Extremitéite vum Terrain. De Joubert schwätz vill mat senge Leit an huet eben d’Spill vrun sech. Wat fir hie schwätzt ass seng Konstanz. Et ass wuel den eenzege Spiller bei dem een déi schlecht Leeschtungen op enger Hand ziele kann. Op der anerer Säit hätte mir onse Stiermer.

De Joachim ass Profi, genéisst och bei Willem II grousse Respekt a bei all Veräi wou hie gespillt huet huet hien duerch seng Astellung a säi Welle gepunkt. Dobäi kennt datt hien eng gewëssen Aura huet a duerch seng Goalgeféierlëchkeet huet hie bei senge Matspiller vill Credit. Hier Positioune schwätzen awer géint e Kapitänsamt. Béid sinn oft op sech eleng gestallt a mussen hier Konzentratioun op hier Aufgab riichten.

De Mario Mutsch, Profi bei St Gallen, brauch kéng Kapitänsbind fir als Chef opzetrieden. An der Vergaangenheet huet hien esouguer bewisen datt esou een Amt éischter nach méi Bass an Aggressivitéit bei him ausléist. Déi Iwwermotivatioun disqualifizéiert hien.

An der Ofwier ginn et mat Hoffmann, Blaise zwee Kandidaten. Leider ass kee vun deenen zwee gesat. Beim éischtgenannten hatt een och d’Gefill datt d’Leeschtungskéier ëmmer méi ofhellt an eng Platz op der Bänk ëmmer méi zu senger Stammplatz sollt ginn. De Spiller vu Virton hatt ugefange méi ze schwätze mä nodeems hien seng Stammplatz verluer hatt an sech op der Bänk zeréckfonnt huet gouf den Elan och gebrach.

 

Am Mëttelfeld hu mir da Gerson, Payal, Da Mota a Bettmer. De Gerson gehéiert nach zu der Kategorie ze vill mat sech selwer beschäftegtsech duerchsetze muss fir en wichtegt Element vun der Equipe ze ginn. Seng introvertéiert Aart a Weis schwätzt och dogéint. Nach ass hie kee Kandidat.

Den Da Mota ass een, am positive Sënn, Egoist. Net fir näischt huet hien a senger Carrière iwwer 100 Goaler fir d’Etzella an de F91 geschoss. Mat mat sengem Asaz senger Aggressivitéit a Schnellegkeet gëtt hien dem Spill Impulser déi oft dann op seng Matspiller iwwerginn. Hien ass wäertvoll awer kee klassesche Leader.

De Payal an de Bettmer kommen och net a Fro. Och wann de Ben een méi aggressive Spiller ass, gehéiert zu sengem Spill eng gewësse Kreativitéit, déi mam Gewiicht vun der extra Verantwortung, gebremst kéint ginn. De Bettmer soll och fräi opspillen. Seng beschte Mätscher mécht hie wann ouni Drock opleeft. Et wier schued wann den eenzege Regisseur an de Réihen vun onser Equipe säi brin de folie verléiere géif.

 

Bleift just nach ee Spiller deen sech,ënner gewësse Konditiounen, zum Chef vun der Equipe entwéckele kéint, den Tom Schnell. Et gi vill Stëmmen an der Press an an den Tribünen déi dofir plaidéieren de Kapitän vun der Fola an der Innenvertéidegung anzesetzen. Ob beim Racing oder bei der Fola hien huet och als jonke Spiller iwwerall Verantwortung iwwerholl. Och wann seng Liiblingsplaz vrun e puer Joer nach am defensive Mëttelfeld war, schéint hie predestinéiert fir an der Mëtt vun der Verdeedegung ze spillen. Hien huet Perséinlechkeet, ass robust, aggressiv an awer fair. Seng Relance, säi Kappball- a säi Stellungsspill sinn vu héijem Niveau. Dozou kennt datt hien sech anscheinend gäre Gedanken iwwert Taktik mécht an a senger Fräizäit oft spezialiséiert Bicher iwwert de Fussball liest. net ze vergiesen datt hien an de leschte Joren déi eenzeg Konstant an der Ofwier war. Wann hien net verletzt war huet en gespillt. do réit hien sech mat Spiller wéi Joubert, Payal, Mutsch, Bettmer a Joachim an. Spiller déi essentiell wichteg sinn. Hien kéint dofir eng ganz gutt Wiel sinn.

Wat awer ganz wichteg wier wier datt den Trainer sech op eng fest Véiererkett an der Ofwier festleet. Et ass bestëmmt net postif fir d’Entwécklung vun enger jonker Equipe wann andauernd d’Basis vun onsem Spill geännert gëtt.

Mir brauchen een onkontestéierte Chef wou d’ Equipe sech drop stäipe kann an dee wann et néideg ass d’Spiller mat der Hand hellt oder wann néideg erwescht.

 

Share:

Déi richteg Paus zum richtegen Zaitpunkt

Nationalekipp By 22. Oktober 2012 Tags: , , 1 Comment

Et hat alles sou schéin ugefang: ee respektabelt Resultat géint Portugal mat enger Leeschtung, déi ee Punkt verdéngt gehat hätt, an eng manner gudd Leeschtung géint Nordirland mee trotzdem ee Punkt erkämpft. D’Enn vun der Geschicht as bekannt: 9 israelesch Goaler innerhalb vu 5 Dee kasséiert, Euphorie verflun, Fans enttäuscht.

Virun allem am Virfeld vum Heemmatch géint Israel war eng Euphorie ze erkennen, déi ee sou scho laang net méi kannt haat: do goung rieds, dass géint Israel awer eppes misst dran sin. Trotz engem Historique géint dat Land, dat engem nëmmen Angscht konnt machen: 0:7, 1:3, 0:5, dat waren déi läscht Resultater am direkte Verglaich. Och de Nationaltrainer huet, ganz ongewinnt, seng Spiller an den héchsten Téin geluewt. Alles dat waren Unzeechen, dass dee Schoss nëmmen no hanne lass konnt goen, an sou koum et dann och. Wat allerdings no deenen zwee Matcher alles an der Press gelaf as, war nach bal méi traureg wéi d’Resultater aus deenen 2 Matcher! Dat betrëfft den Nationaltrainer, mee och Spiller an d’Press, déi  Saache gesot hun, déi net ubruecht waren, an den Tenor war iwwerall méi wéi negatif.

Trotz allem heescht et elo net, d’Bengele bei d’Tromm ze geheien an alles schlecht ze rieden.Sëcher, dës zwee läscht Matcher hun esou guer net an déi Serie vu gudde Leeschtungen aus der Zait virdrun gepasst. Et däerf een elo net alles un desen 2 Matcher moossen. Israel war (a bleift) eisen Angschtgéigner, an déi 2 Klatschen missten jiddereen erëm mat de Féiss op de Buedem brengen; mir sin ëmmer nach “nëmme” Lëtzebuerg, an däerfen trotz der positiver Entwécklung vun de leschte Joeren nach emmer net mengen, mir kéinten eis mat deenen Groussen an Mëttelgroussen moossen. Do kënnt et also wéi geruff, dass elo – ofgesi vum Testmatch géint Schottland de 14. November – fir d’Nationalekipp Wanterpaus as, an jiddereen Zait huet, fir sëch seng Gedanken iwwert den unrühmlechen Oktober ze machen, ze analyséieren an ze selbstreflektéieren  – den Trainer, d’Spiller, awer och d’Fans an d’Medien.

Mir haten eng immens jonk Ekipp um Terrain stoen – do huet also jiddereen nach Potenzial an Zait fir sëch ze verbesseren. Dës Ekipp kann nach eng Rei Joeren esou zesumme spillen an sëch besser zesummen aspillen, an ech denken, dass mir elo net musse wéinst 2 Ausrutscher alles schwaarz gesin. Elo as déi richteg Paus zum richtegen Zaitpunkt, fir no vir ze kucken an dann am nächste Joër rem do virun ze machen, wou mer am September ugefang haten!

 

Share:

Der Mega-Duché du Lëtzebuerg

Allgemeng, Fussball national, Nationalekipp By 21. Oktober 2012 1 Comment

Bei huel se! geet et, wéi der wësst, ëm Fussball. Politik gehéiert onser Meenung no net an de Stadion an net op den Terrain. Mee Politesch Entscheedunge betreffen natierlech och de Sport. Bei onse Belsche Frënn kennen si ee Lied dovunner sangen. Säit Joere bekämpfen sech d’Parteie vun de verschiddene Regiounen. An et gëtt oft domadder gedréit datt d’Land ausernaner fale kéint. Als Konsequenz géifen déi eng dann zu engem Autonome Staat ginn an déi aner géifen un aner Länner annexéiert ginn.

An der Province du Luxembourg ginn et vill Stëmmen déi dofir plaidéiere fir un onst Ländchen attachéiert ze gi wann den Enn vun der Belsch antreffe géif. An och bei der Germanophone sinn der anscheinend vill déi vun esou enger Iddi net ofgeneigt wieren.

Wéi géif sech esou ee Szenario dann op onse Fussball auswierken ? Onst Land géif op e eemol net nëmmen seng Superficie an Awunnerzuel verduebele mä och d’Zuel vun de Fussballsequipe géif bombastesch an d’Lutt goen. Clibb mat verschidde Qualitéiten, Infrastrukturen a finanzielle Méiglechkeete géifen zu eise Veräiner zoustoussen. Clibb, wéi Virton oder Eupen, déi wuel eng grouss Roll an der héijster Divisioun spillen géifen an och vir bei fir den Titel wiere mä och méi kléng Clibb mat engem Niveau vun engem momentan Drëtt-Divisionär. Géifen et zwee Championnater ( Grand-Duché vs Province) gi wou duerno an enger Art Play-Off déi beschte Veräiner de Championstitel ënnereneen ausmaachen oder géife mir an engem Modus mat 2,3 plus ou moins professionelle Lige mat de beschten Equipen aus dem ganze “Mega-Duché” géint enaner spillen

Géif de Comité provincial du Luxembourg Football einfach ons Federatioun integréieren oder géife béid bestoe bleiwen an ënnert enger méi grousser Federatioun fungéieren ? D’Erschafe vun enger ganz néier Federatioun kéint och eng Léisung sinn. Den heite Punkt wier wuel ee vun de komplizéierten a géif jo u sech och dovunner ofhänken a wei engem Championnatsmodus mir spille loosse géifen.

 

D’Fro no der Nationalequipe léisst sech do net schwéier stellen. Falls et géif zum Annexéiere vun den uewegenannte Gebidder komme wier et jo selbstverständlech datt d’Awunner vun dem néie Land all déi eng a selwecht Nationalitéit kréie géifen. Vu datt déi belsch näischt méi wäert wier, well et datt Land jo net méi gëtt, wier et logesch wann et déi Lëtzebuerg wier. Et ginn awer och dann nach zwou Méiglechkeeten. Éischtens, mir loossen zwou Nationalequipen untrieden, ënnert de selwechte Konditioune wéi et momentan a Groussbritannien de Fall ass. Zweetens, eng eenzeg Nationalequipe, ee Land, eng Equipe.

Wat u sech witzeg ass datt sech och falls et zum Annexéiere komme géif mir nach ëmmer kee brauchbare Stadion hätten… Op zu Lëtzebuerg oder an der Province du Luxembourg, néierens gëtt et e Stadion deen international Standarter erfëllt. Déi Problematik géif och dann nach bestoe bleiwen.

Den Impakt op den Zuschauer wier natierlech net geréng. Spille mir wéi uewe genannt zesummen an engem Championnat muss sech de Ass et fir de schonn eng Himmelsrees wann en vun Diddeleng op Wolz fuere muss misst en domadder rechnen och mol zwee Mol méi wäit ze fuere fir säi Veräin ze ënnerstëtzen. Nei Terrain’en, nei Clibb, nei Spiller, nei Iess- an Drénkgewunnechkeeten ! Fir déi eng kléngt dëst ereegend a fir déi aner angschterfellend.

De nationale Fussball kéint wahrscheinlech vun esou enger Situatioun just profitéieren. Méi Awunner heescht méi potentiell Spiller, Zuschauer a Sponsoren.

Hoffe mir mol dat déi Frostellung am Beräich vun der Science Fiction bleift an dat ons Belsch Noperen sech eenz ginn an zu engem Land zesumme wuesse wou sech esou Katastrophenszenarien eriwweregen. D’Diables Rouges probéiere mat hire Leeschtungen an hirem Optrieden dofir sech suergen. Ech wënschen hinne vill Gléck wëll ausser hinne gëtt et just nach Kinnekshaus déi als Symbol vun engem vereenegtem Land gëllen.

 

 

Share:

Willem II verléiert 2-3 géint de PSV

Allgemeng By 20. Oktober 2012 Tags: No Comments

An der Paus stung ët nach 2-0 fir den Aussensäiter aus Tilburg. Den Aurélien Joachim huet den 1-0 vum Podevijn mat enger Pass op den Sneijders ageleed. Kuerz drop huet den Niek Vossebelt mat engem Schlënzer op 2-0 erhéischt.
An der Paus huet den Dick Advocaat wuel déi richtëg Wierder fonnt well den PSV huet opgedréit. Bis zur 68 Minute huet Willem II stand gehaalen an sinn duerno leider richtëg iwwerrannt ginn. Strootman (x2) an den Matavz treffen fir de Phillips Club an dommadder bleiwwen déi dräi Punkten do.
Ee Match op deen d’Equip vum “Auré” opbauen kann.

 

//www.youtube.com/watch?v=WTYJ8e5cnwM

Share:

Nationalstadion – Projet Uewerkuer

Allgemeng, Fussball national By 20. Oktober 2012 Tags: 7 Comments

No RTL Informatiounen kennt Bewegung an den Dossier. Den DP Buergermeeschter vun Déifferdeng, Claude Meisch, huet dem Sportminister Romain Schneider seng Iddi vun der Erweiderung ( ëm déi 8000 Sëtzplazen) vun hirem Stadium op den Dësch geluet. Den Déifferdenger Stadion, den am August réischt seng Dieren opgemeet huet, huet momentan eng Kapazitéit vun 2000  Sëtzplazen. Fir d’Erweiderung missten zwou weider Tribünen opgeriicht ginn an et géif ëm déi 13 Mio kaschten. Bis elo sinn 16 Mio vun der PPP ( Public Private Partnership) investéiert ginn.  Et ass elo um Herr Schneider fir eng schnell Entscheedung ze treffe well d’Baufirma bis zum Enn vum Joer Bescheed wësse muss.

D’Responsable vun der Déifferdenger Demande hunn nieft dem Atout vun enger schneller Realisatioun och nach ervirgehuewen dat et méiglech ass vun der Zuch Connectioun ze profitéieren an datt et schonn eng sëllech Parkplaze Méiglechkeete ronderëm dem Stadion ginn.
Den Dossier ass bis elo dat konkretest wat, säit d’Gespräicher vun engem néie Stadion opkomm sinn, um Sportminister sengem Dësch loung. De Léiwenger Projet vum Flavio Becca schéint, nodeems de Stadion an d’Kommerzfläch Spillball vun der Politik gi sinn, net méi realiséierbar ze sinn. Dëse Projet läit jo am Moment bis 2015 op Äis. Eng Renovatioun vum aktuelle Stadion op der Areler Strooss ass awer nach ëmmer envisageable. De bloe Stater Buergermeeschter, Xavier Bettel, huet dem Staat jo ugebueden hinnen de Josy Barthel z iwwerginn. Domadder géif enger Erneierung vun dësem näischt am Wee stoen. Wann een sech d’Zoustänn an onsem momentanem Stadion awer ukuckt da wier et erstaunlech wann een do manner wéi 13 Mio erastieche misst. Vun internationale Standarden si mir weit ewëg. Et bréicht een nei iwwerdaacht Tribünen, nei Vestiairen, nei Catering Punkten, etc

Den Déifferdenger Stadion huet de Virdeel datt e schonn existéiert an een nëmme wéineg Fantasie brauch fir sech déi nei Tribüne fir ze stellen. Bei der Erneierung vum Josy brauch een der schonn e wéineg méi. Léiweng ass dogéint Science Fiction.

 

Wat en fäerte kann ass datt Accessibilitéit vum Uewerkuerer Terrain net déi optimaalst ass. D’N31 déi vu Bieles op Uewerkuer geet ass bestëmmt net bereet fir dausende vun Auto’en opzehuelen. Da misst ee schonn zimlech fréi doheem fort fuere fir dem potentielle Stau z’ entgoen. An an Zäite vun NIMBY-tum wonnert et datt sech nach keng Associatioun gegrënnt huet fir géint den drohende Verkéier ze protestéieren. Oder steet mol eng ganz Stad hannert engem Projet ?

 

Déi gutt 1700 Parkplaze ronderëm dem Stadion schéinen och zimlech geréng. D’Zuchstatioun ass natierlech eng gutt Iddi mä sinn d’Lëtzebuerger bereet hiren eegenen Auto doheem ze loossen an op den ëffentlechen Transport eriwwer ze klammen ? Wat een dobäi awer gutt hale muss ass datt et momentan och wéineg Parkplaze ronderëm dem Josy ginn. Och do mussen d’Léit op de Bus zeréckgräifen.

Dobäi kennt datt Déifferdeng um südlechem Wupp vun onsem Land läit. Och wann am Minette d’Fussballerhäerz zimlech fest schléit däerf een net vergiessen datt et och Fussballfrënn am Norde ginn. Fir déi wieren dëst 25 Minuten Auto méi.

Wann ee bedenkt datt d’FLF en néie Stadion als DÉI Iddi gesäit fir nei Zuschauer ze gewanne kennen déi uewegenannte Problemer als grouss Hindernisser erschéinnen.

Déi Haaptfro déi een sech awer stelle muss ass op een Nationale Stadion an d’ Stad gehéiert oder net. Fir vill Puristen ass d’ Äntwert eendeiteg. Et falen engem wéineg Länner a wou Nationalequipe hier Heemmatcher net op haaptstadtlëchem Buedem ausdroen. Et falen engem awer och wéineg Länner a wou d’ Weeër esou kuerz sinn an déi een néie Stadion esou batter néideg hunn.

Share: