Mchitarjan- Superstar !
Raym
Muer, de 5 Februar 2013, spillt ons Nationalequipe zu Valence a Frankräich e Frëndschaftsmatch géint Armenien. D’Land wat zwësche Georgien, Tierkei, Aserbaidschan an Iran läit ass e fussballerescht Rätsel. Wann en dem Gespréich vun de Supporter a Fussballinterresséierte Leit nolauschtert hätt Lëtzebuerg gutt Chancë fir muer e positiivt Resultat ze erreechen. Armenien konnt säit hirem éischte Match an dem Zerspläitere vun der UDSSR nach ni un enger Welt- oder Europameeschterschaft deelhuelen.
De meeschten ass dobäi entgaangen datt Armenien an der Weltranglëscht eng Plaz vrun onsem Angschtgéigener Israel läit an dat se mam Henrich Mchitarjan e richtege Superstar an hire Réien hunn. De 24 järege Mëttelfeld-Ass spillt säit 3 Joer fir Schachtar Donesk a mat engem Wäert vu geschätzte 17 Milliounen Euro zielt hien zu engem wäertvollste Spiller vu Fussballeuropa. An der aktueller Spillzäit huet hien ( toutes compétitions confondues) an 31 Mätcher 22 Goaler geschoss. Eng Bemierkenswert Statistik fir ee Mëttelfeldspiller.
Nieft dem Superstar kann een nach de Roman Beresowski eraushiewen. De Goalkeeper vum Dynamo Moskau spillt säit 1996 fir säi Land a genéisst bei de Supporter wéinst senge stabile Leeschtungen eng grouss Popularitéit.
Ons Jonge musse gutt op de Mchitarjan oppassen. Och wann mir Spiller wéi Cristiano Ronaldo oder Ribéry gutt am Grëff haten däerf een net vergiesse wéi vill Schwieregkeeten ons de jonke Gabriel Torje deemools gemeet huet.
De Schlëssel vum Erfolleg läit deemno ënner anerem doranner a wann ons Equipe et fäerdeg bréngt déi selwecht Leeschtung wéi géint Portugal opzebréngen da wier e positiivt Resultat kéng Saach vun der Onméiglechkeet.