Wéi ët schéinnt ass en onglécklëchen Laurent Jans um Wee zréck an d’Heemecht. En iwwermotivéiert Katari huet am Testmatch zweschen den U20 vum Dundee FC an den U20 vu séngem Land dofir gesuergt datt dem Jans säin Test schonn no e puer Minutten zu Enn war. No engem Tackling huet onsen Nationalspiller missen ausgewiesselt ginn an krutt anschéinend no bruet datt et an deenen Ëmstänn kee Sënn mëscht méi lang a Schottland ze bleiwwen.
Am Quotidien erklären de Laurent a säin Agent, den Didier Philippe, datt de Manager vun Dundee FC de Laurent Jans gehalen hätt wann hien ondiskutablen Stammspiller gewierscht wier, dëst wier awer nët direkt de Fall gewierscht. Dem Jans séng Test-Odysee ass elo zu Enn komm an hien integréiert nees de Lëtzebuerger Championnat bei séngem Veräin, der Fola vun Esch.

Bis elo zielt ons Nationalequipe jo bekannterweis 5 Futtballprofi. Gerson, Mutsch, Joachim, Chanot a Phillips verdéngen am Ausland iert Brout mat onser Liiblingssportart. Den Deville nom Opstieg mat Elversberg an déi drëtt Bundesliga ass och nëmmen nach e Schratt vun engem Profivertrag eweg. Beim David Caiado muss an der Chamber datt néit Nationalitéitgesetz gestëmmt ginn well Profi ass hien jo schonn.
An esoueng Konstellatioun mécht och datt déi aner Roud Léiwen an de Fokus vun auslännesche Veräiner réckelen. Et ass kéng Iwwerraschung datt eng Nationalequipe an der ongeféier d’Halschent vun de Stammspiller Profi’e ass méi Scouten, Trainer an aner Veräinsoffizieller unzitt.
Nom gudde Match am Aserbaidschan hunn elo déi éischt Rumeuren de Wee an ons virtuell Redaktioun fonnt.
Déi éischt betrëfft de Laurent Jans an ass och scho sécher méi wéi nëmmen e Geräisch aus der Gerüchteküche. Dëse gouf iwwert de Roby Langers, Vertrauenspersoun vum Chris Phillips a Lëtzebuerger Futtballslegend mat gudde Kontakter zu de Grenats, zu engem serieuxen Thema beim FC Metz. De fréieren Nationalstiermer hatt e puer Interviewen an der lëtzebuerger Press gi wou hien de Laurent Jans un d’Häerz geluet huet de Schratt zum Profispiller ze woen. De bal 21 Joer aalen Folaspiller deen an dësem Joer den Duerchbroch an der Nationalequipe gepackt huet, huet sécher dat néidegt Potential fir dëse Wee ze goen.
Dat zweet Gerücht betrëfft en anere Folaspiller. A ween wonnert et datt et sech heibäi ëm de Stefano Bensi handelt. De Lëtzebuerger Futtballspiller vum Joer a Scorer beim 1-1 zu Baku wier um Sprong an Däitschland oder der Belsch de Wee vum Profi anzeschloen. Ëm wéi eng Veräiner et sech handelt ass net bewosst. Auszeschléissen ass an dem Fall esou e Wiessel net. Schonn 2009 hat den zweet beschte Buteur vun der Saison 2012-2013 de Schratt an d’Ausland gewot. No 6 Méint, 11 Matcher an 2 Goaler huet de groussgewuessene Stiermer dem KMSK Deinze awer nees de Réck gedréit an ass zréck an d’Heemecht komm. Ähnlech wéi beim Joachim kennt och dëst eng zweet Chance fir de 24 Järege Schëfflenger sinn. Eng Chance déi et zu gräife gëllt.